大目伯姆送信仔

【文、圖／張捷明／國立中央大學客家語文暨社會科學學系在職專班碩士】

 

　　大目伯姆學送信仔，佢學送个第一封信仔，係蝦公愛寄分厥女朋友个情書。

　　大目伯姆聽着有事好做，興嘟嘟仔就講：「知知！【蝦公】个女朋友一定係【haˇmaˇ】，聽人講佢身上生有四隻腳，核在大樹下。」佢拿著信仔無看無抵，抹籮抹擦就出發。

　　佢行到＜樹下窿＞，看著蟾蜍四隻腳地泥下爬，著一身打獵用个迷彩裝，當風神，嚇到蚊仔閃遠遠去。

　　大目伯姆就當有禮貌个問佢:「請問這位麼个姨，汝係haˇmaˇ無？」

　　蟾蜍遽遽講：「毋係毋係，一身礫礫硈硈面皮打摺，安到蟾蜍，毋係haˇmaˇ。」

　　佢摎人講恁仔細後，又行到＜葉下遮＞，看著一隻仔；皮滑滑著青衫，人細隻又溜掠，好唱山歌聲頦又靚，專食蚊仔摎飛蟲，日日跳上又跳下。

　　大目伯姆看著，當歡喜个問講：「請問這位麼个妹，汝係haˇmaˇ無？」

　　仔聒聒聒：「毋係毋係，細隻尖鑽，係仔，毋係haˇmaˇ。」

　　大目伯姆又認毋著人矣，佢趕緊摎人會失禮，高不將再向前行。

　　來到＜河邊石＞，佢看著一隻皮滑滑、大大隻、一身長薯仔、毋係蟾蜍乜毋係仔个四腳跳動物。

　　大目伯姆驚再舞差，就當細心細意个問佢：「請問這位麼个姊，haˇmaˇ係汝無？」

　　該隻皮滑滑、大大隻、毋係蟾蜍乜毋係仔个四腳跳動物就應講：「係啊，就係haˇmaˇ，係講毋係haˇmaˇ，無成安到haˇgungˊ哪？」

　　大目伯姆聽著，就透一下大氣講：「唉~總算分尋著人矣，个郵差考試一定做得考一百分。」

　　大目伯姆拿出蝦公个信仔交分haˇmaˇ。

　　haˇmaˇ拿起信仔詳細看清楚，就遽遽講：「毋著毋著，恅差代哩，大目伯姆目花花，汝係『大目新娘看毋著灶孔』，送信仔也毋看地址摎名姓。」

　　haˇmaˇ啜一大口氣續等開始講：「係蛤蟆毋係蝦嫲，還係公蛤蟆，毋係嫲蛤蟆，乜毋係蝦公个蛤蟆，係嫲蛤蟆个公蛤蟆，請汝先舞清楚麼儕係蛤蟆嫲，麼儕係蝦公嫲，毋係見＜haˇmaˇ＞就係蛤蟆，蝦公蛤蟆毋係兩公婆，蝦公摎嫲蝦公正係兩鬥褡，蝦公蛤蟆單淨係好朋友，蝦公蛤蟆做毋得做男女朋友……」

　　大目伯姆分【蛤蟆】【蝦嫲】舞到捩捩轉，蛤蟆講到恁遽竟然毋會結舌，還厲害，定著係日日用舌嫲捉蚊仔正恁慶。好得蛤蟆既經停下來，無再過蛤蟆公、蛤蟆嫲、蝦公公、蝦公嫲、公蛤蟆、嫲蛤蟆緊念，係無佢會暈忒。

　　蛤蟆又好心个報路講：「蝦公个女朋友安着嬷蝦公，毋係蝦嫲，佢核在＜三尺水＞，當多腳、兩撇鬚；水中核、著簑衣；行路打卵退、見燒換紅衣。」

　　大目伯姆頭頷尾鑿緊講恁失禮、又緊講恁仔細，遽遽尋到＜三尺水＞。確實無差，有一隻生鬚个嫲蝦公在水中泅來泅去。

　　嫲蝦公接著蝦公个信仔，驚見笑到一身煘燒歸身紅。

　　大目伯姆特別記下這擺無下無落个經驗，下定決心，下二封信仔一定愛先詳細看真住所名姓，正毋會又恅差代，正通過考試，正式做郵差矣。






　

▲BACK